మధ్యతరగతికి ఆర్టికమంత్రి శుభవార్త

194

న్యూఢిల్లీ: కేంద్ర ప్రభుత్వం కీలక నిర్ణయం తీసుకుంది. స్మాల్ సేవింగ్ స్కీమ్స్‌పై వడ్డీ రేట్లు తగ్గిస్తూ నిర్ణయం తీసుకున్న మోదీ సర్కార్ ఇప్పుడు ఈ నిర్ణయాన్ని వెనక్కి తీసుకుంది. వడ్డీ రేట్ల తగ్గింపు నిర్ణయాన్ని ఉపసంహరించుకుంటున్నట్లు వెల్లడించింది. దీంతో చాలా మందికి ఊరట కలుగనుంది. స్మాల్ సేవింగ్ స్కీమ్స్‌పై వడ్డీ రేట్లలో ఎలాంటి మార్పు ఉండదు. గత త్రైమాసికంలో చిన్న మొత్తాల పొదుపు పథకాలపై ఎలాంటి వడ్డీ ఉందో ఈ త్రైమాసికంలోనూ అదే వడ్డీ రేట్లు వర్తిస్తాయని ఆర్థిక శాఖ తెలిపింది. కేంద్ర ఆర్థిక మంత్రి నిర్మలా సీతారామన్ ఈ విషయాన్ని ట్విట్టర్ వేదికగా తెలియజేశారు. స్మాల్ సేవింగ్ స్కీమ్స్ వడ్డీ రేట్ల తగ్గింపు ఆర్డర్లను వెనక్కి తీసుకుంటున్నట్లు నిర్మలా సీతారామన్ తెలిపారు.

మామూలుగా అయితే వడ్డీ రేట్ల తగ్గింపు నిర్ణయం ఈరోజు నుంచే అమలులోకి రావాల్సి ఉంది. ఇదే జరిగి ఉంటే.. వడ్డీ రేట్లు 110 బేసిస్ పాయింట్ల మేర తగ్గేవి. అయితే ఇప్పుడు కేంద్ర ఆర్థిక మంత్రి నిర్మలా సీతారామన్ వడ్డీ రేట్ల తగ్గింపు ఉండదని స్పష్టం చేశారు. పాత వడ్డీ రేట్లు అలాగే కొనసాగుతాయని వెల్లడించారు. దీంతో పబ్లిక్ ప్రావిడెంట్ ఫండ్ పీపీఎఫ్, సుకన్య సమృద్ధి యోజన (ఎస్ఎస్‌వై) పోస్టాఫీస్ సేవింగ్ స్కీమ్స్‌లో డబ్బులు పెట్టిన వారిపై ఎలాంటి ప్రభావం ఉండదు.