మరింత పక్కాగా కరోనా నియంత్రణ

341

తిరుపతి: ఏపీలో కరోనా కేసుల సంఖ్య పెరగుతోంది. రోజు రోజుకు తీవ్రత పెరుగుతూ.. సెకండ్ వేవ్ భయం అందర్నీ వెంటాడుతోంది. టీటీడీ కూడా అప్రమత్తం అయ్యింది. తిరుమలలో ఆంక్షలు కట్టుదిట్టంగా అమలు చేస్తున్నారు. టీటీడీ అదనపు ఈవో ఏవీ ధర్మారెడ్డి శ్రీ‌వారి ద‌ర్శ‌నార్థం వ‌చ్చే భక్తులు, వారికి సేవ‌లందించే ఉద్యోగుల ఆరోగ్య భద్రత దృష్ట్యా తీసుకోవాల్సిన ముందు జాగ్రత్త చర్యలపై స‌మీక్ష‌ నిర్వహించారు.. కీలక నిర్ణయాలు తీసుకున్నారు. వైకుంఠం క్యూ కాంప్లెక్స్, శ్రీవారి ఆలయం, అన్న ప్రసాద కేంద్రం, కళ్యాణ కట్టతో పాటు రద్దీగా ఉండే ప్రాంతాల్లో భక్తులు తప్పనిసరిగా మాస్కులు ధరించాలి. ప్ర‌తి 2 గంట‌లకోసారి శానిటైజ్ చేస్తున్నారు. సర్వ దర్శనం టోకెన్లను 22 వేల నుంచి 15 వేలకు తగ్గించారు.. త‌మిళ‌నాడు, క‌ర్ణాట‌క రాష్ట్రాల భక్తులు ఈ విష‌యాన్ని దృష్టిలో పెట్టుకోవాలి.

అన్న ప్రసాద కేంద్రం, గదుల కేటాయింపు కౌంటర్ల దగ్గర థర్మల్ స్క్రీనింగ్ యంత్రాలు ఏర్పాటు చేశారు. అద్దె గదుల్లో ఇద్దరికి మాత్రమే అనుమతి ఉంటుంది. ఖాళీ చేసిన వెంటనే పూర్తిగా శానిటైజ్ చేస్తారు. తిరుమలకు వచ్చే భక్తులు తమ వెంట తప్పనిసరిగా మాస్కులు, శానిటైజర్లు తెచ్చుకోవాలి. భక్తులు శానిటైజ‌ర్ ప్ర‌తి రెండు గంట‌ల‌కోసారి వినియోగించాలి. వైకుంఠం క్యూ కాంప్లెక్స్, శ్రీవారి ఆలయంలో టీటీడీ ఏర్పాటు చేసిన శానిటైజర్లు భక్తులు ఉపయోగించుకోవాలి. క్యూలైన్ల‌లో కాలితో నొక్కే శానిటైజ‌ర్లు ఏర్పాటు చేశారు. తిరుమలలోని అన్ని ప్రాంతాల్లో భక్తులు భౌతిక దూరం పాటించాలి. కోవిడ్ పరిస్థితులను అంచనా వేసుకుని రానున్న రోజుల్లో అవ‌స‌ర‌మైతే ప్రత్యేక ప్రవేశ దర్శన టికెట్లను కూడా తగ్గించాలని భావిస్తున్నారు. టైం స్లాట్ దర్శన టోకెన్లు పొంది రోడ్డు మార్గంలో వచ్చే భక్తులను అలిపిరి చెక్ పాయింట్ వద్ద ముందురోజు మధ్యాహ్నం 1 గంట నుండి మాత్రమే అనుమతిస్తారు.

టైంస్లాట్ దర్శన టోకెన్లు గల నడకదారి భక్తులను అలిపిరి, శ్రీవారి మెట్టు కాలినడక మార్గాల్లో ముందురోజు ఉదయం 9 గంటల నుండి మాత్రమే అనుమతిస్తారు. భక్తులు దర్శన సమయానికి అరగంట ముందు మాత్రమే వైకుంఠం క్యూకాంప్లెక్స్‌లోకి అనుమతిస్తారు. అలిపిరి దగ్గర ప్రతి వాహనాన్నీ శానిటైజ్ చేస్తున్నారు. భక్తులందరికీ థర్మల్ స్కాన్ చేస్తున్నారు. జలుబు, దగ్గు, జ్వరం ఉన్నవారు త‌మ తిరుమల యాత్ర‌ను వాయిదా వేసుకోవాలి. ఉద్యోగులందరికీ వ్యాక్సిన్ వేయిస్తున్నారు.. దీన్ని అన్ని విభాగాల అధికారులు విధిగా ప‌ర్య‌వేక్షించేలా సూచ‌న‌లిచ్చారు. కొవిడ్ జాగ్ర‌త్త చ‌ర్య‌ల‌పై రేడియో బ్రాడ్‌కాస్టింగ్ విభాగం ద్వారా 5 భాష‌ల్లో నిరంత‌ర ప్ర‌చారం చేస్తున్నారు. యాత్రికులు చేయాల్సిన‌వి, చేయ‌కూడ‌ని అంశాల‌తో ర‌ద్దీ ఎక్కువ‌గా ఉండే కూడ‌ళ్ల‌లో ఫ్లెక్సీలు ఏర్పాటు చేశారు.