జన్మ సిద్ధాంతం

అనేక ఆటుపోట్లను ఎదుర్కొని కొన్ని వందల శతాబ్ధాల తరబడి ఏ మాత్రం చెక్కుచెదరకుండా ఇంతలా ఒక శాస్త్రం తన మనుగడ సాగిస్తోందీ అంటే  అది  చాలా గొప్ప విషయంగా చెప్పక తప్పదు.  కేవలం ఎవరో ఋషులు  చెప్పారని ఇన్ని వందల  సంవత్సరాలుగా  ఒక విషయాన్ని మనం కొనసాగించలేము కదా!  ఎంతో పుణ్యం చేసుకుంటే గానీ మనకీ మానవ జన్మలభించదు.  అందునా గొప్ప సంస్కృతీ సంప్రదాయాలు కలిగిన భారత దేశంలో పుట్టడం నిజంగా మన అదృష్టం.  ఇక్కడి గాలి పవిత్రం, నీరు పవిత్రం. ఇక్కడ అనాదిగా వస్తూ ఉన్న ఆచార సాంప్రదయాలతో భారతదేశ ప్రజలు సాగిస్తున్న జీవనశైలి ఇతర దేశాల వారికి ఎంతో ఆదర్శ ప్రాయమైనది.

ఇంతకీ జ్యోతిష్యం అంటే ఏమిటి?

జ్యోతిశ్ అనగా ప్రకాశవంతమైనదీ అని అర్ధము. జ్యోతిష్య శాస్త్రం అనేది అనేక వ్యవస్థలు, సాంప్రదాయాలు, విశ్వాసాల సమాహారం.  ఇందులో ఖగోళ  వస్తువుల స్థితిగతులను మరియు  అనుబంధిత  అంశాల  వివరములను  ఉపయోగించి  వ్యక్తిత్వం, మానవ సంబంధములు, ఇతర భూగోళ విషయాలకు  సంబంధించిన  సమాచారాన్ని తెలియజేయు శాస్త్రం. జ్యోతిష్యశాస్త్రాన్ని ఆంగ్ల
ములో “ASTROLOGY” అని అంటారు. పురాతన గ్రీకు భాషలో astron అంటే ‘నక్షత్ర రాశి లేక నక్షత్ర సమూహం’ మరియు logia అంటే ‘గురించిన  అధ్యయనం’ అని అర్ధం.  భవిష్యత్తు  ఎలా ఉంటుందో తెలుసుకోవాలన్న ఆకాంక్ష ప్రతివ్యక్తిలోనూ  ఉంటుంది.  జీవితంలో జరిగే మంచి చెడులను తెలుసుకునేందుకు  జ్యోతిష్కులను ఆశ్రయిస్తుంటారు.

కొందరు హస్తసాముద్రికం ఆధారముగా చెబుతూండగా, ఇంకొందరు సంఖ్యాశాస్త్రాన్ని ఆధారంగా చేసుకొని,  మరికొందరు  గ్రహ సంచారాల ఆధారంగా జాతకాలు చెబుతుంటారు. చేతిలోని  రేఖల  ఆధారంగా చెప్పేది  హస్తసాముద్రికం కాగా గ్రహగతుల  ఆధారంగా చెప్పేది జన్మ కుండలి ఆధారిత జ్యోతిష్యం. జన్మకుండలి ద్వారా జాతకాలు  తెలుసుకునేందుకు  వ్యక్తి పుట్టినతేదీ (నెల, సంవత్సరంతో సహా) సమయం,  పుట్టిన ప్రదేశం తప్పనిసరి.  ఇవన్నీ ఖచ్చితముగా ఉంటేనే జాతకం కూడా ఖచ్చితంగా చెప్పే అవకాశం ఉంటుంది.  జనన సమయం సరిగా ఉండాలి. ఇదే లగ్నం నిర్ణయించేందుకు ముఖ్య ఆధారం.  ఈ లగ్నాన్ని బట్టే ఫలితాలు నిర్ధారించడం  సాధ్యం అవుతుంది.  అలాగే లగ్నం ఖచ్చితంగా నిర్ధారించేందుకు  పుట్టిన  ప్రదేశం కూడా ముఖ్యమే.

సూర్యోదయ సమయాలు  ఆయా ప్రాంతాలను బట్టి కొన్ని నిముషాలు హెచ్చు తగ్గులుంటాయి. దీని ఆధారంగా లగ్న నిర్ణయం చేయాల్సి ఉంటుంది. మేషాది మీన రాశి వరుకూ ఒక్కొక్క రాశి ప్రమాణం సుమారు రెండు గంటల వరుకు వుండవచ్చు.  ఒక్కోసారి  నిముషాల తేడాలో లగ్నం మారవచ్చు.  పుట్టిన  ప్రదేశం తెలుసుకోవడం ద్వారా లగ్నంలో తేడాలు రాకుండా చూసే అవకాశముంటుంది. కొందరికి పుట్టిన తేదీ,సమయాలు తెలియవు. వారి పెద్దలు చెప్పే కొండగుర్తుల ద్వారా కొంతవరకూ  సంవత్సరం, తేదీ, నక్షత్రం వంటివి నిర్ధారించవచ్చు.  అయితే జన్మ కుండలి వేయడం ద్వారా సాధ్యంకాదు. కేవలం రాశి ద్వారా  ఫలితాలు  తెలుసుకోవచ్చు  లేదా “ప్రశ్న” ద్వారా తెలుసుకోవచ్చు..