50 బ్రాండ్లు తెచ్చిన జగనన్న
వాటిని  అవమానిస్తున్న లోకేష్
(మార్తి సుబ్రహ్మణ్యం- 9705311144)

దేశంలో ఎక్కడా దొరకనన్ని  లిక్కర్ బ్రాండ్లు ఏపీకే సొంతం. వాటిని ఎంచుకోలేక మందుబాబులకు మతిపోవసిందే. అన్ని రకాల బ్రాండ్లు ఒక్క ఏపీలోనే దొరుకుతాయి.  అది ఆంధ్రా ప్రజల అదృష్టం. మందుబాబుల ఆరోగ్యం కోసం-వారిని మందు అలవాటు మాన్పించేందుకు, ప్రత్యేక రసాయనాలతో తయారుచేయించిన సీఎం జగనన్నకు, మందుబాబులు రుణపడితీరాల్సిందే. ఇప్పుడు ఆంధ్రా నుంచి పరాయి రాష్ట్రాలకు వెళుతున్న వారంతా, ఏపీ బ్రాండ్లను డజన్ల సంఖ్యలో తమ వెంట తీసుకువెళుతున్నారట. ఎందుకంటే ప్రపంచస్థాయి నాణ్యత ఉన్న అలాంటి బ్రాండ్లు, మరెక్కడా దొరకవు కాబట్టి!
‘ప్రెసిడెంట్‌మెడల’ంటే సహజంగా, ఉత్తమ ప్రతిభ ఉన్న వారికి రాష్ట్రపతి ఇచ్చే అవార్డనుకుంటారు. కానీ.. ఏపీలో ఏకంగా మందుకు ,ఆ పేరుతోనే బ్రాండ్ నేమ్ పెట్టి రాష్ట్రపతి మెడల్ ప్రతిష్ఠ పెంచినందుకు అభినందించకుండా.. టీడీపీ యువనేత లోకేష్ లాంటి వాళ్లు వ్యంగ్యాస్త్రాలు సంధిస్తూ, అవమానించడం దారుణం. ఇది రాష్ట్ర ప్రజలను అవమానించడమే. ప్రెసిడెంట్‌మెడల్ అనే బ్రాండ్‌ను ఎంచుకున్న కంపెనీకి, దానిని ప్రోత్సహిస్తున్న జగనన్న సర్కారుకు జోహారులర్పించాల్సిందే.

అవును. ఏపీలో దొరికే లిక్కరు బ్రాండ్లు, కొత్త కంపెనీలు భూతద్దం వేసి వెతికినా, ఏ రాష్ట్రంలోనూ  కనిపించవు. ఇవన్నీ, జగనన్న ముఖ్యమంత్రి అయిన తర్వాత రాష్ట్రంలో అడుగుపెట్టిన కంపెనీలే. మరి వాటిని స్వాగతించాలి కదా? జగన్ అధికారంలోకి వచ్చిన తర్వాత, రాష్ట్రంలో కొత్త కంపెనీలు రాకపోగా, ఉన్న కంపెనీలు జగన్  తీరు వల్ల పారిపోతున్నాయని, విపక్షాలు ఆరోపించడం అన్యాయం. నిజానికి జగన్ సీఎం అయిన తర్వాత, రాష్ట్రంలో దాదాపు లిక్కర్ బ్రాండ్లు ఆనందంగా తూగుతూ- తుళ్లుతూ- పొంగుతూ తరలివచ్చాయి. ఇంగ్లడ్, ఇటలీ, అమెరికా, ఫ్రాన్స్, అర్జెంటైనా వంటి దేశాలలో మాత్రమే దొరికే, స్కాచ్‌ల స్థాయిలో ఉన్న బ్రాండ్లన్నీ ఆంధ్రాకు తరలివెళ్లడం గర్వకారణమే కదా? ఆ కంపెనీలు జగనన్న చుట్టూ ఉన్న వారివే కావచ్చు. ఆయన పార్టీ ఎమ్మెల్యేలే లీజుకు తీసుకుని,  నడిపిస్తూ ఉండవచ్చు. ఏం? జగనన్న అనుచరులు, వ్యాపారాలు చేయకూడదా ఏమిటీ?

జగనన్న సీఎం అయిన తర్వాత దాదాపు 50 కొత్త లిక్కరు బ్రాండ్లు మార్కెట్‌లోకి వచ్చినప్పటికీ, రాష్ట్రంలో ఒక్క పరిశ్రమ కూడా రాలేదని నిందలు వేయడం అన్యాయమే కాదు, అక్రమం కూడా. 50 కొత్త లిక్కరు బ్రాండ్లు రావడమంటే ఆషామాషీ కాదు. దానిపై ఎంతమంది కార్మికులు ఆధారపడుతున్నారు? ఎంతమంది ఆ బ్రాండ్లు తాగడం వల్ల, ఆరోగ్యం చెడిపోయి ఆసుపత్రులకు ఆదాయం పంచుతున్నారు? ఇవన్నీ రాష్ట్రానికి ఆదాయం వచ్చేవే కదా? సంపద పెరిగి అందరికీ పంపిణీ అవుతున్నట్టే కదా? ఏపీ బ్రాండ్లకు అంతర్జాతీయ ఖ్యాతి వస్తే ప్రశంసించకుండా, ఇలా సూటిపోటి మాటలతో సతాయించడం సరైనది కాదన్నది, మందుబాబు వాదన. ఏపీలో ఇన్ని అద్భుతాలు జరుగుతున్నప్పుడు.. రాష్ట్రానికి ఏమీ రాలేదని ఎలా బురద చల్లుతారు? జగనన్న వచ్చిన తర్వాత కొత్త లిక్కరు బ్రాండ్లు తప్ప, ఏమీ రాలేదన్న లోకేష్ ట్వీట్ చూస్తే మందుబాబులకు కోపం రాదూ?! నిజానికి ఆ అవమానం మందుబాబులకే కాదు, ప్రపంచ ప్రఖ్యాత కంపెనీలతో పోటీపడుతున్న ఏపీ బ్రాండ్లకూ పెను అవమానమే!

By RJ

Leave a Reply

Your email address will not be published. Required fields are marked *

Close Bitnami banner